Quruq mevalar eksportini kengaytirish bo‘yicha yangi tashabbuslar ilgari surildi

Muloqot davomida mamlakat agrar sohasida amalga oshirilayotgan islohotlar, qishloq xo‘jaligi mahsulotlarini chuqur qayta ishlash hamda eksport salohiyatini oshirish masalalari muhokama qilindi.

Xususan, O‘zbekistonda yetishtirilayotgan quruq mevalarni Yaqin Sharq va Yevropa davlatlari bozorlariga eksport qilish hajmini ko‘paytirish, yangi logistika yo‘nalishlarini yo‘lga qo‘yish hamda mahsulotlarning raqobatbardoshligini kuchaytirish bo‘yicha fikr almashildi.

Shuningdek, qishloq xo‘jaligi sohasida xalqaro hamkorlikni kengaytirish, investitsiyalarni jalb qilish hamda ilg‘or boshqaruv va texnologik tajribalarni joriy etish masalalariga alohida e’tibor qaratildi.

Tomonlar agrar sohada barqaror ishlab chiqarish zanjirlarini shakllantirish, mahsulotlarni standartlashtirish va eksport geografiyasini kengaytirish bo‘yicha tizimli choralarni amalga oshirish muhimligini ta’kidladi.

Uchrashuv yakunida tomonlar qishloq xo‘jaligi sohasidagi hamkorlikni yangi bosqichga olib chiqish, istiqbolli qo‘shma loyihalarni amalga oshirish hamda o‘zaro aloqalarni yanada mustahkamlashga tayyor ekanliklarini bildirdi.