Uchrashuv davomida ikki davlatning madaniy sohadagi hamkorligi va uning yuqori darajasi alohida ta’kidlandi.

"O‘zbekiston va Ozarbayjon o‘zining madaniyati va urf-odatlari bilan bir-biriga juda yaqin bo‘lgan qardosh xalqlardir. Ikki davlat rahbarlarining o‘zaro do‘stona aloqalari mamlakatlar o‘rtasidagi madaniy almashinuvga keng zamin yaratib bermoqda" - dedi O‘zbekiston madaniyat vaziri Ozodbek Nazarbekov.

Shuningdek, O‘zbekiston va Ozarbayjonda tashkil etilayotgan xalqaro festivallarda ikki davlat ijodiy jamoalarining doimiy ishtiroki ushbu samimiy hamkorlikning yaqqol namunasi ekanligi alohida ta’kidlandi.

Xususan, 2024-yilning 23-avgust kuni oliy darajadagi tashrif doirasida Toshkent shahrida “O‘zbekiston va Ozarbayjon do‘stlik konserti” tashkil etilganligi va unda O‘zbekiston Respublikasi Prezidenti tomonidan Po‘lat Bulbulo‘g‘liga “O‘zbekiston xalq artisti”, Ozarbayjon Respublikasi Prezidenti tomonidan Farrux Zokirovga “Ozarbayjon xalq artisti” faxriy unvonlari topshirilganligi mamlakat rahbarlarining madaniyat sohasiga qaratayotgan yuksak e’tiborlari ekanligi alohida qayd etildi.

Shu bilan birga, vazir Ozodbek Nazarbekov o‘tgan yilning avgust oyida Samarqandda bo‘lib o‘tgan XIII Sharq taronalari xalqaro musiqa festivalida Ozarbayjonning “Semurg‘” guruhi festivalning Gran-pri mukofotini qo‘lga kiritgani va joriy yilning aprel oyida azim Xiva shahrida bo‘lib o‘tgan Xalqaro Baxshichilik san’ati festivalida “Ozarbayjon oshiqlari” guruhi festivalning Gran-pri g‘olibi bo‘lgani bilan yana bir bor tabrikladi.

O‘z o‘rnida, Ozarbayjon madaniyat vaziri Adil Kerimli ham ikki davlat o‘rtasidagi madaniy hamkorlikni qardosh birodarlar hamkorligi sifatida ko‘rishini hamda 2024-yil 23-26-yanvar kunlari Boku shahrida tashkil etilgan “O‘zbekiston fani va madaniyat kunlari” tadbirlari, 2025-yilning 29-30-aprel kunlari Ozarbayjon davlat akademik milliy drama teatrida ilk marotaba o‘zbek adabiyotining taniqli namoyandasi Abdulla Qodiriyning “O‘tkan kunlar” romani asosida sahnalashtirilgan spektakl premyerasi ozarbayjon xalqi tomonidan juda iliq kutib olingani ta’kidladi.

Qolaversa, joriy yilning iyun oyida Boku shahrida o‘tkazilgan “Mug‘am olami” VII Xalqaro musiqa festivalida O‘zbekiston vakillari 1 va 3-o‘rinni egallaganlari bilan qutladi.

Qayd etish joizki, O‘zbekiston va Ozarbayjon o‘rtasidagi nafaqat siyosiy va iqtisodiy, balki madaniy-gumanitar sohalarda ham o‘zaro hamkorlikni mustahkamlashga alohida e’tibor qaratmoqda.

Ikki davlat rahbarlari tomonidan mazkur sohaga qaratilayotgan e’tibor orqali qardosh xalqlar o‘rtasida do‘stlik va birodarlik aloqalari yanada rivojlanmoqda.