Járdemge mútáj shańaraqlardı qollap-quwatlaw kólemi keńeytiledi

Dúnyadaǵı geosiyasiy keskinlik, energiya resurslarınıń hám shiyki zat bahalarınıń ósiwi, támiynat hám logistika shınjırlarındaǵı úzilisler kóplegen mámleketlerde inflyaciyalıq basımdı kúsheytpekte. Bunday sharayatta xalıqtıń qárejetlerin jeńilletiw hám mútáj shańaraqlarǵa mánzilli járdem kórsetiw ayrıqsha áhmiyetke iye.

Prezentaciyada elektr energiyası, gaz, kómir hám kommunallıq xızmetler ushın tólemler boyınsha ámeldegi qollap-quwatlaw mexanizmlerin keńeytiw máseleleri kórip shıǵıldı.

Atap aytqanda, ısıtıw máwsiminde gazlespegen hám gaz jetip barmaǵan aymaqlarda elektr energiyası boyınsha bazalıq normanı 200 kilovatt-saattan 350 kilovatt-saatqa arttırıw usınısı maqullandı.

Dekabr ayında járdemge mútáj shańaraqlarǵa bir mártelik materiallıq járdem ajıratıw máselesin kórip shıǵıw usınıs etildi.
Sonday-aq, Sociallıq reestrge kirmegen mútáj shańaraqlardıń elektr energiyası, gaz, kómir hám kommunallıq xızmetler qárejetlerin qaplawda shańaraqtıń hár bir aǵzasına qollanılatuǵın dáramat normasın 1 million 430 mıń sumǵa shekem arttırıw usınısı kórip shıǵıldı. Nátiyjede qollap-quwatlaw qamtıp alıwı jáne 166 mıń shańaraqqa keńeyedi.

Elektr energiyası hám gaz boyınsha bazalıq normadan artıq tutınıw qárejetleriniń bir bólegin qaplaw múddetin 2028-jıl 1-aprelge shekem sozıw usınıs etildi. Bul ilaj benen bir jılda 470 mıń shańaraqtı qamtıp alıw názerde tutılmaqta. Sharayatı awır máhállelerdegi 3 mıń shańaraqtı ıssılıq jaǵınan qorǵaw hám energiyanı únemleytuǵın úskeneler menen támiyinlew jumısları da dawam ettiriledi.

Mámleketimiz basshısı Húkimetke belgilengen járdem ushın qarjılardı óz waqtında baǵdarlaw, mútáj shańaraqlardı anıqlawda mánzillilikti támiyinlew hám járdemniń hár bir shańaraqqa jetip barıwı ústinen qadaǵalawdı kúsheytiwdi tapsırdı.

Sonday-aq, energiya resursların islep shıǵarıwshı hám jetkerip beriwshi kárxanalardıń jumısın transformaciyalaw, basqarıw nátiyjeliligin arttırıw, artıqsha qárejetler hám tarmaqlardaǵı joǵaltıwlardı qısqartıw boyınsha da bir qatar kórsetpeler berildi.