Janılǵı-energetika tarmaǵındaǵı reformalardı jedellestiriw boyınsha investorlar menen sóylesiw bolıp ótti

Mámleketimiz jetekshisi turaqlı energiya támiynatı ekonomikanıń rawajlanıwı, isbilermenlerdiń rejeleri hám xalıqtıń abadanlıǵı ushın áhmiyetli ekenin atap ótti. Keyingi on jılda energetika bazarı jeke menshik investiciyaǵa ashılıp, mámleketlik-jeke menshik sheriklik mexanizmleri engizildi. Bul dáwirde tarawǵa 35 milliard dollarlıq investiciya kirgizildi. Quyash, samal hám gidroelektr stanciyaları esabınan qayta tikleniwshi energiyanıń jámi generaciyadaǵı úlesi 31 procentke jetti.

Sóylesiw kúni ulıwma bahası 4 milliard 700 million dollarlıq altı iri joybar boyınsha kelisimlerge qol qoyıldı. Olar sheńberinde 3 mıń megavattlıq generaciya hám 400 megavattlıq energiya saqlaw quwatlılıǵı jaratıladı.

Prezidentimiz energetikaǵa investiciya tartıwda jańa basqısh baslanıp atırǵanın atap ótti. Endi hár bir joybar jańa quwatlılıq jaratıw menen birge támiynattıń isenimliligin arttırıw hám elektr shıǵınların azaytıwı zárúr. 2030-jılǵa shekem 22 mıń megavatt jańa quwatlılıq jaratıw, jıllıq elektr islep shıǵarıw kólemin 129 milliard kilovatt-saattan arttırıw hám qayta tiklenetuǵın energiyanıń úlesin 54 procentke jetkeriw maqset etilgen.

Bul ushın generaciya, uzatıw hám energiya saqlaw sistemaları óz-ara baylanıslı halda rawajlandırıladı. Qaysı aymaqta qanday quwatlılıq zárúrligi aldınnan rejelestirilip, tayar joybarlar ashıq tańlawǵa shıǵarıladı. Investorlarǵa jer maydanı, tarmaqqa jalǵanıw hám elektrdi satıp alıw shártleri aldınnan málim etiledi. Jaqın arada ulıwma quwatlılıǵı 2 mıń 200 megavatt bolǵan altı quyash hám samal stanciyası joybarı tańlawǵa qoyıladı.

Birinshi márte energetika tarawınıń 2050-jılǵa shekemgi Milliy bas rejesi islep shıǵılıp, járiyalanadı. Kelesi jılı 1-martqa shekem tarmaqlarǵa jalǵanıw imkaniyatları kartası, 1-iyulǵa shekem bolsa tolıq bas reje usınıladı. Bul investorlarǵa joybarların uzaq múddetke rejelestiriw imkaniyatın beredi.

Elektr tarmaqları hám energiya saqlaw infrastrukturasın keńeytiwge ayrıqsha itibar qaratıldı. 2030-jılǵa shekem 5 mıń kilometrlik tarmaqtı hám 16 iri podstanciyanı qurıw, energiya saqlaw quwatlıqların 4,5 gigavattqa jetkeriw rejelestirilgen. Sonday-aq, sanaat kárxanaları hám maǵlıwmat oraylarınıń ósip baratırǵan talabın esapqa alıp, olar ushın isenimli elektr támiynatın aldınnan shólkemlestiriw zárúr ekenligi atap ótildi.

Tarqatıw tarmaqlarında jeke menshik sektordıń qatnasın keńeytiw, sociallıq taraw obektleri hám nasos stanciyaların energiyanı únemleytuǵın texnologiyalar tiykarında jańalaw máseleleri de kórip shıǵıldı. “Jasıl” energiya islep shıǵarıwshılardıń sertifikatlar hám karbon kreditlerden qosımsha dáramat alıwı ushın mexanizmler engiziledi.

Mámleketimiz basshısı investiciyalıq joybarlar jergilikli sanaat ushın da jańa imkaniyatlar ashıwı kerek ekenligin atap ótti. Joqarı kúshleniwli úskeneler, energiya saqlaw sistemaları hám samal generatorlarınıń komplektlewshi bóleklerin lokalizaciyalaw boyınsha 850 million dollarlıq 12 perspektivalı joybar tayarlanǵan. Forish rayonında qurılıp atırǵan atom elektr stanciyası ushın zárúr ónimler islep shıǵarılatuǵın arnawlı sanaat zonasın shólkemlestiriw rejelestirilmekte.

Neft-gaz tarawında geologiya-izlew jumısları, kánlerdiń nátiyjeliligin arttırıw hám shiyki zattı tereń qayta islew boyınsha birge islesiw keńeytiledi. Ústirtte “SOCAR” hám “British Petroleum” kompaniyaları menen altı investiciyalıq blokta izlew jumısları alıp barılmaqta, sırt elli sheriklerge usınıs etiw ushın jáne 128 blok tayarlanǵan. Buxara wálayatındaǵı MTO joybarın ámelge asırıw,

Buxara hám Ferǵana neftti qayta islew zavodların modernizaciyalaw rejeleri de atap ótildi.
Suyıltılǵan gaz támiynatına bazar mexanizmlerin basqıshpa-basqısh engiziw máselesine toqtap, mámleketimiz basshısı onda támiynattıń úzliksizligi, qáwipsizlik hám xalıqqa xızmet kórsetiw sapası tiykarǵı bolıwı shárt ekenligin atap ótti.

Jańa energetika obektleri ushın qánigeler tayarlawda investorlardıń qatnasın keńeytiw usınıs etildi. Kelesi oqıw jılınan joqarı oqıw orınlarında energetika baǵdarları boyınsha qabıllaw kvotaları arttırıladı, hár jılı 50 jastıń jetekshi sırt el universitetlerinde bilim alıwı ushın mámleketlik grantlar ajıratıladı.

Investorlar jer ajıratıw, tarmaqqa jalǵanıw hám texnikalıq shártlerdi alıwǵa baylanıslı máselelerdi turaqlı sóylesiw arqalı sheshiw baslamasın alǵa qoyǵan edi. Usı múnásibet penen Janılǵı-energetika tarawında investorlar keńesi shólkemlestiriledi. Prezident Administraciyası basshısı basshılıq etetuǵın Keńes joybarlardı tayarlawdan baslap, obektlerdi iske qosıwǵa shekemgi processte payda bolatuǵın máselelerge operativ sheshim tabıw menen shuǵıllanadı.

Ilaj juwmaǵında Prezidentimiz investorlar menen pikirlesip, olardıń pikir-usınısların tıńladı, óz-ara paydalı birge islesiwdi dawam ettiriwge tayar ekenin bildirdi.

Prezident Shavkat Mirziyoev Janılǵı-energetika tarmaǵındaǵı investorlar keńesiniń birinshi májilisi sheńberinde Ózbekstan – Saudiya Isbilermenler keńesiniń járdemshi baslıǵı, “ACWA” kompaniyasınıń basqarma baslıǵı Muhammad Abunayyannıń basshılıǵındaǵı delegaciyanı qabılladı.

Sóylesiw dawamında ámeliy birge islesiwdi jáne de keńeytiw hám tiykarǵı birgeliktegi joybarlardı jedellestiriw máseleleri dodalandı.

Sońǵı jılları Saudiya Arabstanı kompaniyalarınıń mámleketimiz bazarına qızıǵıwshılıǵı barǵan sayın artıp barmaqta. Sonıń nátiyjesinde “jasıl” energetika, zamanagóy infrastrukturalar, joqarı texnologiyalar, densawlıqtı saqlaw hám basqa da tarawlarda iri investiciyalıq joybarlar ámelge asırılmaqta.

Tárepler erisilgen kelisimlerdi óz waqtında hám sapalı ámelge asırıw arqalı eki tárepleme ámeliy birge islesiwdi jáne de joqarı basqıshqa kóteriwge tayar ekenin atap ótti.

Ushırasıw juwmaǵında saudiyalı investorlar Ózbekstanda jaratılǵan qolaylı investiciyalıq ortalıq ushın jáne bir márte minnetdarshılıq bildirdi.

Ózbekstan Respublikası Prezidenti Shavkat Mirziyoev Janılǵı-energetika tarmaǵındaǵı investorlar keńesiniń májilisinde qatnasıw ushın elimizge kelgen Ázerbayjannıń “SOCAR” kompaniyasınıń basshısı Rovshan Najaf hám “British Petroleum” kompaniyasınıń úlken vice-prezidenti Jovanni Kristofoli menen ushırasıw ótkerdi.

Sóylesiw waqtında energetika tarawında usı jetekshi kompaniyalar menen tabıslı birge islesiw jolǵa qoyılǵanı qanaatlanıwshılıq penen atap ótildi.

Ústirt platosındaǵı uglevodorod kánlerin ózlestiriw boyınsha gezektegi ámeliy ilajlar dodalandı. Ullı Britaniyanıń “British Petroleum” kompaniyası bul iri joybarǵa qosılǵanı joqarı bahalandı.

Neft-gaz tarawında jańa joybarlardı alǵa qoyıw, neft hám neft ónimlerin uzaq múddetli jetkerip beriw hám satıw tarmaǵın jolǵa qoyıw áhmiyetli ekenligi atap ótildi.

Bunnan soń Ózbekstan Respublikası Prezidenti Shavkat Mirziyoev “Cengiz Holding” basqarmasınıń baslıǵı Mehmet Jengizdi qabılladı.

Mámleketimiz basshısı eki mámleket arasındaǵı sawda kólemi artıp, iri investiciyalıq joybarlar tabıslı ámelge asırılıp atırǵanın qanaatlanıwshılıq penen atap ótti.

“Cengiz Holding” penen sóylesiw dawamında energetika, geologiya hám infrastruktura tarawlarındaǵı joybarlardı bunnan bılay da keńeytiw máseleleri dodalandı.

Sonday-aq, ıssılıq elektr stanciyaların qurıw hám elektr energiyasın bólistiriw tarmaqların modernizaciyalawǵa qaratılǵan perspektivalı joybarlar kórip shıǵıldı.

Ózbekstan Prezidenti Shavkat Mirziyoev Janılǵı-energetika tarmaǵındaǵı investorlar keńesiniń birinshi májilisi sheńberinde Túrkiyanıń “Aksa Enerji” kompaniyasınıń direktorlar keńesiniń baslıǵı Jamil Kazanchidi qabılladı.

Sóylesiw dawamında kompaniya menen óz-ara paydalı birge islesiwdi keńeytiw, atap aytqanda, onıń Ózbekstan energetika tarmaǵın rawajlandırıw hám texnologiyalıq modernizaciyalaw joybarlarında qatnasıw máseleleri kórip shıǵıldı.
Tárepler anıq joybarlar boyınsha jumıslardı jedellestiriwge kelisip aldı.

Ózbekstan Prezidenti Shavkat Mirziyoev Tashkent qalasında Janılǵı-energetika tarmaǵındaǵı investorlar keńesiniń birinshi májilisi sheńberinde Birlesken Arab Ámirlikleriniń jetekshi kompaniyalarınıń basshıların qabılladı.

Ushırasıwda “Masdar” bas atqarıwshı direktorı Muhammad Jamil al-Ramahiy hám “AMEA Power” baslıǵı Husayn al-Novays qatnastı.

Sóylesiw waqtında Ámirlikler menen strategiyalıq sheriklik jedel rawajlanıp atırǵanı qanaatlanıwshılıq penen atap ótildi. Jıldıń basınan berli óz-ara sawda kólemi 40 procentke ósti. Iri investiciyalıq joybarlar tabıslı ámelge asırılmaqta.

Sóylesiw juwmaǵında “jasıl” energetika, zamanagóy infrastrukturalar, tarmaqlar hám sanaat kooperaciyası, turizm hám xızmet kórsetiw sıyaqlı baǵdarlardaǵı joybarlardı jedellestiriw hám keńeytiwge kelisip alındı.

Ózbekstan Respublikası Prezidenti Shavkat Mirziyoev Janılǵı-energetika tarmaǵındaǵı sırt el investorları keńesiniń májilisi sheńberinde Qıtaydıń jetekshi kompaniyaları – “CAMCE”, “China Energy” hám “Sinoma Energy” basshıların qabılladı.

Ushırasıwda qayta tikleniwshi energetika, energiyanı saqlaw, shıǵındını qayta islew hám suw támiynatı tarawlarında birgeliktegi joybarlardı alǵa qoyıw máseleleri kórip shıǵıldı.

Qıtay kompaniyalarınıń Ándijan wálayatında logistika xabın shólkemlestiriw, agrovoltaikanı rawajlandırıw hám neft-gaz tarawındaǵı joybarlardı ámelge asırıw boyınsha baslamaları qollap-quwatlandı.

Ózbekstan Prezidenti Shavkat Mirziyoev Janılǵı-energetika tarmaǵındaǵı investorlar keńesiniń birinshi májilisinde qatnasıw ushın elimizge kelgen Omannıń “Voltamp Energy” kompaniyası direktorlar keńesiniń baslıǵı Sayyid Ayman al-Busaydiydi qabılladı.

Óz-ara paydalı birge islesiwdi rawajlandırıw, sonıń ishinde, quyash elektr stanciyaların qurıw hám joqarı kúshleniwli transformatorlar islep shıǵarıw máseleleri dodalandı.

Ushırasıw juwmaǵında kompaniya qatnasıwındaǵı aǵımdaǵı hám jańa joybarlardı “jol kartası” tiykarında ámelge asırıw boyınsha kelisimge erisildi.