Sanlı bilimlendiriw arqalı jaslar ushın imkaniyatlar keńeytilediSanlı bilimlendiriw arqalı jaslar ushın imkaniyatlar keńeytiledi

Málimleme texnologiyaları tarawında 2030-jılǵa shekem 300 mıń jumıs ornın jaratıw boyınsha belgilengen maqset usı jıldıń ózinde erisildi. Endi sanlı ekonomikanıń jańa baǵdarların rawajlandırıw esabınan 2030-jılǵa shekem jáne 500 mıń jumıs ornın jaratıw wazıypası qoyılmaqta.

Bunıń ushın jaslardı oqıtıwdan baslap, kásiplik kónlikpelerin tastıyıqlaw hám jumısqa jaylastırıwǵa shekemgi processlerdi qamtıp alatuǵın birden-bir sanlı bilimlendiriw ekosistemasın qáliplestiriw zárúr. Prezentaciyada 2030-jılǵa shekem 5,5 million jastı dástúriy hám aralıqtan turıp oqıtıwǵa qaratılǵan kózqaraslar kórip shıǵıldı.

Mektep oqıwshıları ushın “Al-Xorezmiy miyrasxorları” hám “Bes million jasalma intellekt jetekshileri” joybarların keńeytiw, joqarı bilimlendiriw mákemeleri hám jeke menshik oqıw oraylarınıń imkaniyatların birlestiriw názerde tutılmaqta.

Mámleketimiz basshısı robototexnika, kompyuter oyınların jaratıw, startaplar hám basqa da perspektivalı baǵdarlarda jılına 1 million jastı oqıtıw wazıypasın qoydı. Bul ushın milliy trenerler korpusın qáliplestiriw, onlayn bilimlendiriw platformaların hám qısqa múddetli sanlı kurslardı tezirek iske qosıw, ilimiy izertlewlerdi rawajlandırıp, olardıń nátiyjelerin ámeliyatqa keńnen engiziw zárúr ekenligi atap ótildi.

Prezentaciyada joqarı bilimlendiriwde tayarlanıp atırǵan kadrlardıń mamanlıǵın texnologiyalar hám miynet bazarındaǵı ózgerislerge beyimlestiriw máseleleri de kórip shıǵıldı. Jasalma intellekt, mikrosxemalardı joybarlastırıw, dron texnologiyaları hám kompyuter oyınların islep shıǵıw sıyaqlı baǵdarlarda bilimlendiriwdi rawajlandırıw, studentlerdiń ámeliy joybarlarda qatnasıwın keńeytiw usınıs etildi.

Sonday-aq, informatika muǵallimleriniń jasalma intellekt boyınsha bilimlerin arttırıw hám olardı sertifikatlaw, joqarı bilimlendiriw mákemeleri studentleri ushın xalıqaralıq sanlı bilimlendiriw kurslarınan paydalanıw imkaniyatların keńeytiw máseleleri dodalandı. Ferǵana tájiriybesi tiykarında iOS programmistlerin tayarlaw orayların shólkemlestiriw, jeke menshik bilimlendiriw oraylarına mentorlar tayarlaw usınısları maqullandı.

Ilimiy izertlew hám qollanbalardı bilimlendiriw menen baylanıstırıwǵa da itibar qaratıldı. Atap aytqanda, joqarı oqıw orınlarında ornatılǵan sistemalar, mikroelektronika hám buyımlar interneti boyınsha qánigelerdi tayarlaw, injenerlik qollanbalar hám izertlew laboratoriyalarınıń jumısın qollap-quwatlaw boyınsha usınıslar bildirildi.

Jaslardıń alǵan bilimi miynet bazarında óz ornın tabıwı ushın “Sanlı jaslar” platformasın rawajlandırıw rejeleri de kórip shıǵıldı.

Onda bilimlendiriw, kónlikpeler, tildi biliw dárejesi hám sertifikatlar haqqındaǵı maǵlıwmatlardı jıynaw, jaslarǵa say bos jumıs orınların usınıs etiw hám olardıń bántligin baqlap barıw názerde tutılmaqta.

Sanlı bilimlendiriwge global texnologiyalıq kompaniyalardı keńnen tartıw zárúr ekenligi atap ótildi. Ótken jılı bul baǵdarda 22 million dollar grant tartılǵan. Sistemalı birge islesiw arqalı bul kórsetkishti usı jıldıń aqırına shekem 60 million dollarǵa, 2030-jılǵa barıp bolsa jılına 100 million dollarǵa jetkeriw tapsırıldı.

Usı jılı tartılatuǵın grant qarjılarınıń yarımın sanlı bilimlendiriwge, qalǵan yarımın mamanlıqtı arttırıw baǵdarlamaları hám shetki aymaqlarda sanlı bilimlendiriw orayların shólkemlestiriw, olardı jasalma intellekt, robototexnika hám programmalastırıwdı oqıtıw ushın zamanagóy úskeneler menen támiyinlewge qaratılatuǵını belgilendi.

Prezidentimiz sanlı bilimlendiriwde qamtıp alıw menen birge oqıtıwdıń sapası hám onıń bántlikke tásiri de tiykarǵı ólshem bolıwı kerek ekenligin atap ótti. Juwapkerlerge belgilengen maqsetlerge anıq baǵdarlamalar arqalı erisiw, aymaqlardaǵı imkaniyatlardı keńeytiw, jeke menshik sektor hám xalıqaralıq sherikler menen islesiwdi kúsheytiw boyınsha tapsırmalar berildi.

Sonday-aq, Sanlı texnologiyalar xalıqaralıq orayınıń jumısın jolǵa qoyıw jumıslarınıń barısı boyınsha málimleme berildi.