Jańa joybarlar hám sanaattıń rawajlanıwı Qashqadáryanı mámlekettiń aldınǵı aymaǵına aylandırmaqta

Qashqadárya wálayatın sociallıq-ekonomikalıq rawajlandırıw boyınsha usı jılı 13-martta qabıl etilgen qarar sheńberinde klaster tárepinen gezleme islep shıǵarıw hám boyaw fabrikası shólkemlestirildi. Bahası 54 million dollar bolǵan joybar nátiyjesinde jılına 20 mıń tonna gezleme islep shıǵarıw hám boyaw quwatlılıǵına iye liniyalar iske qosıldı. Fabrikada 840 jumıs ornı jaratıldı.

Kárxanada suwdıń hám energiyanıń jumsalıwın azaytıwǵa ayrıqsha itibar qaratılǵan. Bahası 3 million dollar bolǵan jabıq suw aylanısı sisteması óndiriste paydalanılǵan suwdıń 95 procentten aslamın tazalap, qayta paydalanıw imkaniyatın beredi. Sonıń esabınan jılına 1,1 million kub metr suw únemlenedi.

Fabrikanı úzliksiz elektr energiyası menen támiyinlew ushın gaz generatorı ornatılǵan. Imarattıń tóbesi hám diywallarına ulıwma quwatlılıǵı 3,5 megavatt bolǵan quyash panelleri ornatılǵan. Bul sheshimler elektr energiyası, ıssı suw hám puw támiynatındaǵı qárejetlerdi azaytıp, ónimniń ózine túser bahasın azaytıwǵa xızmet etedi.

Keleshekte “Sulton Tex Group” klasteri usı erkin ekonomikalıq zonada 70 million dollarlıq joybardı ámelge asırıp, 3 mıń 570 jumıs ornın jaratıwı rejelestirilgen. Wálayattıń basqa rayonlarındaǵı ulıwma bahası 17 million dollar bolǵan joybarlar bolsa, jáne 1 mıń 220 adamdı jumıs penen támiyinlew názerde tutılmaqta.

Mámleketimiz basshısı fabrikadaǵı óndirislik processi hám ónimlerdiń kórgizbesi menen tanıstı. Bul jerde engizilgen resurs únemlewshi texnologiyalar basqa toqımashılıq kárxanaları ushın úlgi bolıwı kerek ekenligin atap ótti.

Kárxanada miynet etip atırǵan Dilorom Xoliyorova Prezidentimiz benen sáwbette jumıs ornı hám jaratılǵan sharayatlardan qanaatlanatuǵının bildirip, kórsetilip atırǵan qollap-quwatlaw ushın minnetdarshılıq bildirdi.
– Insan miynet etse, álbette, nátiyjesi de basqasha boladı. Mine, usı jańa áwlad isbilermenlerimiz benen házir pútkilley basqa dárejege shıǵıp atırmız, olar tek ǵana qosımsha qun shınjırın jaratıp qoymastan, al “jasıl” texnologiyalar menen ekologiyaǵa ǵamqorlıǵın da kórsetpekte, – dedi Prezidentimiz.

Soń Prezident Shavkat Mirziyoev Qarshı qalasındaǵı “FM World” kárxanasınıń jumısı menen tanıstı.
Kompleks Qıtaydıń 500 iri jeke menshik kárxanası qatarına kirgizilgen “Jiangsu World Group” korporaciyasınıń quramına kiredi.

Bahası 20 million dollarlıq joybar tolıq sırt el investiciyası esabınan qarjılandırılıp, 5 gektar maydanda jaylasqan. 12 mıń kvadrat metr maydanda óndirislik imaratlar qurılǵan. Bul jerde 200 jumıs ornı jaratılıp, óndiristiń ayırım processleri avtomatlastırılǵan.

Házirgi waqıtta kárxanada “Nasaf” brendi astında bes túrli markadaǵı traktorlar, paxta teriw mashinaları hám basqa da awıl xojalıǵı texnikaları jıynalmaqta. Traktorlar GPS, avtopilot, tógin beriwdi basqarıw hám aralıqtan baqlaw sistemaları menen úskenelengen. Bul atız jumısların anıq orınlaw, janılǵı hám basqa da resurslardıń jumsalıwın azaytıwǵa xızmet etedi.

Kárxanada dala sharayatında texnikalarǵa xızmet kórsetiw, nasazlıqlardı aldınnan anıqlaw hám olardan qáwipsiz paydalanıw boyınsha turaqlı oqıw-shınıǵıwları da ótkerilmekte.

Traktorlardı jıynawda lokalizaciyalaw dárejesi 30 procentti quraydı. Kárxananıń ózinde 138 túrdegi detal hám komplektlewshi bólekler islep shıǵarılmaqta. Komplektlewshi bólekler islep shıǵarıwdı keńeytiw hám kárxanalar menen kooperaciyanı kúsheytiw arqalı lokalizaciyalaw dárejesin basqıshpa-basqısh arttırıw zárúr ekenligi atap ótildi.

Jıllıq eksport kólemin 50 million dollarǵa jetkeriw, ónimlerdiń 30 procentin qońsı mámleketlerge jetkerip beriw rejelestirilgen.
Prezidentimiz óndiris procesi hám tayar texnikalar menen tanıstı.
– Usı waqıtqa shekem awıl xojalıǵı texnikaların sırt elden alıp keletuǵın edik. Bul bolsa ózine túser bahasına tásir etetuǵın edi.

Qashqadáryada fermerlerimizdiń jumısın jeńillestiretuǵın zamanagóy texnikalardıń ózimizde, ózimizdiń brendimiz astında islep shıǵarılıwı bir waqıtları árman edi. Lokalizaciyalaw – awıl xojalıǵındaǵı reformalarımızdıń úzliksiz dawamı. Bunday jumıslardı izbe-iz dawam ettiremiz, – dedi mámleketimiz basshısı.

Prezident Shavkat Mirziyoev Qashqadárya wálayatına saparı sheńberinde jańa joybarlardı iske qosıw hám qurılısına start beriw máresiminde qatnastı.

Mámleketimiz basshısı sońǵı bes jılda wálayatqa 20 trillion sumlıq qarjı qaratılıp, 7 milliard dollarlıq sırt el investiciyası tartılǵanın atap ótti. Shiyki zattı tereń qayta islewge qaratılǵan mıńlaǵan joybarlar iske qosıldı, xalıqtıń jan basına dáramat úsh esege arttı.
– Endi jetistirilgen ónimdi wálayattıń ózinde tereń qayta islep, wálayat xalqınıń múnásip dáramat tabıwına sharayat jaratıw kerek, – dedi Prezidentimiz.

Usı maqsette ulıwma bahası 6 milliard dollardan aslam bolǵan 161 joybar tayarlanǵan. Máresimde 69 joybar iske qosıldı, jáne 92 siniń qurılısına start berildi.

Iske qosılıp atırǵan 28 sanaat kárxanasında 7 mıńǵa shamalas turaqlı jumıs ornı jaratılmaqta. Italiyanıń “Cotonella” brendi jılına 8,5 million dana tayar trikotaj ónimin islep shıǵarıwdı jolǵa qoymaqta. Koson, Mirishkor hám Kasbi rayonlarında toqımashılıq tarawında jáne 14 joybar baslanbaqta. Olardıń esabınan 18 mıń jumıs ornın jaratıw názerde tutılǵan.

Awıl xojalıǵı ónimlerin qayta islewde de jańa quwatlıqlar shólkemlestirilmekte. AQShlı birge islesiwshilerdiń qatnasıwındaǵı “Wosune Food Ingredients Karshi” kárxanası 3,5 mıń gektar maydanda jetistiriletuǵın 100 mıń tonna miywe-ovoщlardı qayta isleydi. Onıń 40 million dollarlıq ónimin “Nestlé” hám “Purina” sıyaqlı xalıqaralıq brendler ushın eksportqa baǵdarlaw rejelestirilgen. Egipet hám Pakistan investorları bolsa Nishon hám Ǵuzor rayonlarında 24 mıń gektar jerdi ózlestirip, kartoshka jetistiriw hám sharwashılıq joybarların baslamaqta.
– “Jasıl” ekonomika wálayattı rawajlandırıw ushın bekkem tiykar boladı, – dedi mámleketimiz basshısı.

Aqsuw dáryasında ulıwma quwatlılıǵı 24 megavattlıq úsh gidroelektr stanciyası iske qosıldı. Qarshı rayonında Qıtaydıń “Shanghai SUS” kompaniyasınıń qatnasıwında shıǵındıdan elektr energiyasın islep shıǵaratuǵın 150 million dollarlıq zavodtı jıldıń aqırına shekem iske qosıw rejelestirilgen. Sonday-aq, Kitap, Yakkaboǵ hám Shahrisabz rayonlarında ulıwma quwatlılıǵı 58 megavatt bolǵan toǵız mikroGES qurıladı.

Kitap rayonında Ázerbayjan menen birgelikte altın qazıp alıw joybarı baslanbaqta. Shahrisabz rayonında bolsa rossiyalı investorlar menen 300 million dollarlıq aspa jol, miymanxana hám taw-lıjası kurortı kompleksin qurıw názerde tutılǵan.

Prezidentimiz sırt elli birge islesiwshiler hám investorlarǵa wálayatqa investiciya, jańa texnologiya hám innovaciyalar alıp kirip atırǵanı ushın minnetdarshılıq bildirdi. Olardıń usınısları tıńlandı.
– 2027-jıl Qashqadáryanı zamanagóy sanaat hám agrotexnologiyalar tiykarında rawajlandırıw jılı boladı, – dedi mámleketimiz basshısı.

Bunnan soń Prezidentimiz rámziy túymeni basıp, jańa joybarlardı iske qostı hám gezektegileriniń qurılısına start berdi.
Soń Prezident Shavkat Mirziyoev “Qashqadárya” erkin ekonomikalıq zonasındaǵı “Wosune Food Ingredients Karshi” kárxanasınıń jumısı menen tanıstı.

Aymaqta jetistirilip atırǵan miywe-ovoщlardı tereń qayta islewge qánigelesken jańa kárxana shiyki zattan joqarı qosımsha qunlı ónim tayarlap, onı sırtqı bazarlarǵa jetkerip beriw menen shuǵıllanbaqta.

AQShtıń “Wosune International Inc” kompaniyasınıń investiciyası esabınan qurılǵan kárxananıń bahası 8,5 million dollar. 150 turaqlı jumıs ornı jaratılǵan.

Bul jerde geshir, bolgar burıshı, asqabaq, alma, kók piyaz, shpinat hám hár qıylı kók shópler konvekciyalıq úskenelerde keptiriledi. Bul texnologiya ónimniń tábiyiy dámi hám azıqlıq qásiyetlerin saqlawǵa xızmet etedi. Óndiris procesiniń 30 procenti robotlastırılǵan.

Tayar ingredientler tez tayarlanatuǵın taǵamlar, pripravalar, konservalar hám kosmetikalıq ónimlerdi islep shıǵarıwshı kompaniyalarǵa jetkerip beriledi. Ónimler Rossiya, Evropa hám ǴMDA mámleketlerine eksport etilmekte. Jıllıq eksport kólemin 40 million dollarǵa jetkeriw rejelestirilgen.

Shiyki zat támiynatın keńeytiw maqsetinde wálayattaǵı diyqan xojalıqları menen tikkeley kooperaciya baylanısların jolǵa qoyıw názerde tutılmaqta.

Mámleketimiz basshısı kárxananıń óndiris procesi hám ónimlerin kózden ótkerdi.
Prezident Shavkat Mirziyoev Qashqadárya aldınǵı kásiplik sheberlik texnikumı hám onıń negizinde shólkemlestirilgen “Kásipler qalashası”nıń jumısı menen de tanıstı.

Bahası 42 milliard sum bolǵan texnikum 5,2 gektar maydanda jaylasqan. Onıń quramında oqıw imaratları hám laboratoriyalar, ustaxanalar, jataqxana, sport maydanshası, asxana hám “Kásipler qalashası” qurılǵan. Jámi 14 imarat hám obektti qamtıp alǵan mákemede 80 jumıs ornı jaratılǵan.

Házir bul jerde 10 baǵdar boyınsha 417 jas bilim almaqta. Oqıw procesine Germaniya, Shveycariya, Ullı Britaniya, Qıtay hám Qubla Koreyanıń aldınǵı tájiriybesi engizilmekte.

Texnikum wálayattaǵı basqa da qánigeli bilimlendiriw mákemeleri ushın metodikalıq hám ámeliy baza bolıp xızmet etedi. Olarda bilim alıp atırǵan 2 mıń 800 oqıwshı usı jerde ámeliyat óteydi. Ámeliyat hám dual bilimlendiriwdi shólkemlestiriw boyınsha 32 iri shólkem menen shártnamalar dúzilgen, jáne 11 i menen birge islesiwdi jolǵa qoyıw rejelestirilgen.

Jıldıń aqırına shekem 500 jastı nemis tiline oqıtıp, Germaniyada tólenetuǵın ámeliyatqa jiberiw názerde tutılmaqta. Mámleketimiz basshısı stajirovkaǵa baratırǵan bir topar jaslar menen sáwbetlesti.
– Barlıq háreketlerimiz sizlerdiń kásip iyelewińiz ushın. Kásipli bolsańız, hesh qashan kem bolmaysız. Bilim hám ónerdi puqta iyeleseńiz, qay jerde bolsańız da, óz ornıńızdı tabasız. Búgin sizlerge usınday imkaniyat berilmekte. Onnan durıs paydalansańız, ózińiz, perzentlerińiz hám aqlıqlarıńız ushın abadan turmısqa tiykar jaratasız. Sonıń ushın bir minutıńız da biykar ótpesin, – dedi Prezidentimiz.

Sóylesiwde mektep dáwirinen-aq kásip hám til úyretiwge itibar qaratıw zárúr ekenligi de atap ótildi. “Kásipler qalashası” usı maqsette mektep oqıwshılarınıń qızıǵıwshılıǵı hám qábiletin erte anıqlaw, olardı kásipke baǵdarlaw ushın shólkemlestirilgen.

Jaslar bul jerde málimleme texnologiyaları, “jasıl” energetika, robototexnika, dronlardı basqarıw hám elektromobillerge xızmet kórsetiw sıyaqlı baǵdarlar menen tanısadı. Sonday-aq, tigiwshilik, aspazlıq, santexnika, zootexnika hám agronomiya boyınsha ámeliy kónlikpelerdi iyeleydi.

Wálayatta ámelge asırılıp atırǵan investiciyalıq joybarlar jańa qánigelerge talaptı arttırmaqta. Sonlıqtan, texnikumnıń imkaniyatlarınan tolıq paydalanıw, bilimlendiriw baǵdarlamaların jumıs beriwshilerdiń talabına beyimlestiriw hám jaslardı jańa kárxanalar ushın maqsetli tayarlaw áhmiyetli ekenligi atap ótildi.

Bul jerde Qashqadárya wálayatınıń bilimlendiriw sistemasındaǵı zamanagóy kózqaraslar jáne Germaniya menen birge islesiwdegi perspektivalı qospa joybarlar boyınsha málimleme berildi.

Prezident Shavkat Mirziyoev Qashqadárya wálayatına saparı dawamında “Jasıl mákan” ulıwma milliy joybarı sheńberinde Ǵuzor rayonında shólkemlestirilgen nál jetistiriw orayına bardı.

Mámleketimiz basshısınıń 2026-jıl 23-sentyabrdegi pármanı menen máhállelerdiń kóklemzarlastırıwdaǵı rolin kúsheytiw, “3-30-300” principi tiykarında jasıl aymaqlardı keńeytiw wazıypaları belgilengen. Jańa oray sapalı nál jetistiriwdi máhállelerdiń talabı, tereklerdi tárbiyalaw hám xalıqtıń bántligi menen baylanıstırıwǵa qaratılǵan.

Sırt el tájiriybesi tiykarında 65 gektar maydanda shólkemlestirilgen komplekstiń bahası 9,5 milliard sum. Bul jerde 100 ge shamalas jumıs ornı jaratılǵan.

Oraydıń 50 gektarı sayamanlı terekler, 5 gektarı miyweli terekler, 3 gektarı puta hám gúl nálleri jetistiriwge ajıratılǵan. Birinshi basqıshta 1,6 million, keyingi basqıshta 5 million nál jetistiriw názerde tutılǵan. Bul jerde 41 túrdegi sayamanlı hám iyne japıraqlı terek nálleri bar.

Komplekste ashıq kóbeytiw maydanları, ıssıxana, tuqımnan nál jetistiriw hám nállerdi sayalaw imaratları qurılǵan. Sıyımlılıǵı 4,2 mıń kub metr bolǵan úsh membranalı suw basseyni shólkemlestirilip, 20 gektar maydanda tamshılatıp suwǵarıw sisteması ornatılǵan. Kompost hám mulcha tayarlaw úskeneleri hám quyash panellerinen paydalanılmaqta.

Zamanagóy texnologiyalar jıl dawamında, sonıń ishinde, egiw máwsiminen tısqarı waqıtta da nál jetistiriw imkaniyatın beredi. Esap-sanaqlarǵa bola, dástúriy usıllarǵa salıstırǵanda jetistiriw kólemi 8-10 esege kóbeyip, suwdıń jumsalıwı 3 esege azayadı. Bul nállerdiń ózine túser bahasın 30-40 procentke azaytıwǵa xızmet etiwi kútilmekte.

Orayda máhállelerdi kóklemzarlastırıw ushın ayrıqsha xızmetler jolǵa qoyılǵan. Olar nál hám putalar jetkerip beriw, zıyanlanǵan tereklerdi emlew, mulchalaw hám tamshılatıp suwǵarıw sistemaların shólkemlestiriwdi qamtıp aladı. Hár bir máhállege toǵayshı ustaz biriktirilip, “jetiligi” aǵzaları ushın hár bir egis máwsimi aldınan oqıwlar ótkeriledi.

Xalıq ta nál jetistiriw procesine tartılmaqta. Kooperaciya shártnamaları tiykarında puqaralarǵa náller jetkerip beriledi. Olar shańaraqlarda bir-eki máwsim tárbiyalanıp, tayar nálge aylanǵannan soń, kepillengen túrde satıp alınadı. Bul shańaraqlarǵa qosımsha dáramat deregin jaratadı.

Mámleketimiz basshısı orayda jaratılǵan sharayatlardı kózden ótkerip, nál egiw hám baǵ jaratıw xalqımızǵa tán jaqsı dástúr ekenin atap ótti. Oraydıń máhállelerdi kóklemzarlastırıw hám xalıqtıń dáramatların arttırıwdaǵı imkaniyatları haqqında málimleme berildi.

Prezident Shavkat Mirziyoev Ǵuzar rayonında “Qashqadárya Jingu” kárxanası tárepinen Sinczyan usılında paxta jetistirilip atırǵan atızda boldı.

Mámleketimiz basshısına shigit egiw, ǵawashanı suwǵarıw hám tárbiyalawda qollanılıp atırǵan texnologiyalar haqqında maǵlıwmat berildi. Bul jerde 2,2 mıń gektar maydanǵa shigit plyonka astına qos qatarlap egilgen, tamshılatıp suwǵarıw tolıq engizilgen.

Plyonka topıraqtaǵı ıǵallıqtı hám temperaturanı saqlap, shigittiń erte hám bir tegis ónip shıǵıwına járdem beredi. Suw hám tógin bolsa tamshılatıp suwǵarıw sisteması arqalı tikkeley ǵawashanıń tamırına jetkeriledi. Nátiyjede, suwdıń jumsalıwı 30-40 procentke, tóginniń jumsalıwı derlik 30 procentke azayadı. Zúráát dástúriy maydanlarǵa salıstırǵanda 10-15 kún aldın pisedi.

Prezidentimiz paxta atızında jetistirilgen ónim hám agrotexnikalıq ilajlardı shólkemlestiriw procesi menen tanıstı. Dástúriy usılda gektarınan 30-35 centner paxta alınsa, Sinczyan texnologiyasında bul kórsetkish 60-70 centnerge shekem jetiwi múmkin.

Kárxana atızlarında ónimdarlıq gektarına 55 centnerdi, jalpı ónim bolsa 12,3 mıń tonnanı quramaqta.
Atız jumıslarında agrodronlardan da paydalanılmaqta. Bul ayırım agrotexnikalıq ilajlardı tezirek orınlaw, janılǵı jumsalıwın azaytıw imkaniyatın bermekte.

Qıtay investiciyasınıń qatnasıwında shólkemlestirilgen “Qashqadárya Jingu” agroklasteri Koson, Nishon, Ǵuzor, Kókdala hám Mirishkor rayonlarında jámi 18,3 mıń gektar maydanda jumıs alıp baradı. Bul jerlerdiń úlken bólegi burın paydalanılmaǵan shól hám qarawsız maydanlar bolǵan. Joybarǵa 128 million dollar investiciya kirgizilip, 50 jumıs ornı jaratılǵan. Eksport kólemi bolsa 8,5 million dollardı quraydı.

Bul jerde mámleketimiz basshısına wálayattıń awıl xojalıǵında ámelge asırılıp atırǵan jumıslar haqqında da málimleme berildi.
Prezident Shavkat Mirziyoev Qamashı rayonındaǵı CHim máhállesinde ámelge asırılǵan dóretiwshilik jumısları hám xalıqtıń bántligin támiyinlew ilajları menen tanıstı.

“Jańa Ózbekstan kórinisindegi máhálle” sıpatında rawajlandırılıp atırǵan CHimde 5,5 mıńnan aslam xalıq jasaydı, olardıń derlik yarımın jaslar quraydı.

Infrastrukturanı jańalawǵa 55 milliard sum qaratılıp, 240 orınlıq balalar baqshası, 640 orınlıq mektep, máhálle hám jaslar orayları, dem alıw baǵı qurılǵan. Sonday-aq, 4,5 kilometrlik jol qurılıp, elektr támiynatı hám suwǵarıw tarmaqları jańalanǵan.

Mámleketimiz basshısı máhálle orayındaǵı oyın maydanında balalar hám olardıń anaları menen sáwbetlesti. Jaslar kitapxanasında bolsa kitapqumar jigit-qızlardıń maqset hám umtılısları menen qızıqsındı.

Sóylesiwde Prezidentimiz Ózbek tili bayramı múnásibeti menen Abdulla Aripov, Erkin Vohidov hám Halima Xudoyberdievanıń dóretiwshiligin esledi. Tilge, milliy ádebiyatqa hám ata-babalarımızdıń miyrasına itibar artıp baratırǵanın atap ótti.
– Búgin tilimizge, milletimizge hám ózligimizge bolǵan húrmet barǵan sayın joqarılamaqta. Adamlar jáne kitap oqıwǵa umtılıp atır. Ata-babalarımızdan qalǵan ruwxıy miyrastı qayta tiklep atırmız. Qamashınıń CHim máhállesinde de usınday ruwxıy ortalıq, usınday sharayatlar jaratılmaqta, – dedi mámleketimiz basshısı.

Prezidentimiz joqarı bilimlendiriw imkaniyatlarınıń keńeygeni, bilimli hám Watanın súyetuǵın kadrlardı tayarlaw mámlekettiń keleshegi ushın zárúr ekenin atap ótti.
– Burın 100 jastan tek ǵana 9 ı joqarı bilimlendiriwde oqıǵan bolsa, búgin 45 i oqıp atır. Joqarı oqıw orınların shólkemlestiriw, professor-oqıtıwshılarǵa sharayat jaratıw úlken miynet talap etedi. Biraq, Ózbekstannıń keleshegi ushın milliy maqtanıshı bar,

Watandı súyetuǵın kadrlar kerek. Men sizlerge isenemen. Janajan Watanımız, Qashqadárya úlkesiniń keleshegi sizlerdiń qolıńızda,-dedi mámleketimiz jetekshisi.

CHimde xalıqtıń dáramatın arttırıw ushın da jańa imkaniyatlar jaratılǵan. Hayal-qızlar miynet etip atırǵan gilemshilik hám kesteshilik kárxanasına 3,5 milliard sum investiciya kirgizilgen. Banklerdiń járdeminde 20 ǵa shamalas shańaraqta ulıwma maydanı 36 sotıx bolǵan ıssıxanalar shólkemlestirilgen, ónimlerdi saqlaw ushın 200 tonnalıq muzlatqısh qurılǵan. Bul jumıslar arqalı 80 nen aslam jumıssız puqaranıń bántligi támiyinlengen.

Sonday-aq, kooperaciya tiykarında limon jetistiriw rawajlandırılmaqta. Xalıqqa nál, tógin hám agrotexnikalıq xızmetler jetkerip beriledi, jetistirilgen ónim kepillengen bahada satıp alınadı. Limon nálleri arasına kartoshka, brokkoli hám kók shópler egiw esabınan terekler miywe bergenge shekem hár bir ıssıxanadan qosımsha 14-16 million sum dáramat alınbaqta.

Máhállede 70 isbilermen jumısın keńeyttirgen, jáne 20 jańa isbilermenlik subekti shólkemlestirilgen. Avtomagistral boyındaǵı xızmet kórsetiw obektleriniń sanı 31 den 137 ge jetip, 200 den aslam jańa jumıs ornı jaratılǵan. CHim hám oǵan qońsılas máhállelerdegi 1,2 mıń shańaraq kooperaciya tiykarında farmacevtika hám kosmetika sanaatında qollanılatuǵın altey ósimligin jetistirmekte.

Sapar etiwdiń juwmaǵında Prezidentimiz máhálle belsendileri hám nuranıylar menen sáwbetlesti. Olar máhálledegi ózgerisler haqqında óz pikirlerin bildirip, eldiń abadanlıǵı hám jaslardıń keleshegi ushın pátiya etti.
Prezident Shavkat Mirziyoevtiń Qashqadárya wálayatına saparı dawam etpekte.